இரு மாவட்டங்களுக்கு தலா 324 கோடி ரூபா ஒதுக்கீடு

“வறுமையை வெல்வோம்; வளமான கிராமங்களை உருவாக்குவோம்; மக்களின் சக்தியால் நாட்டைக் கட்டியெழுப்புவோம்!” என்ற உயரிய நோக்குடன் முன்னெடுக்கப்படும் பிரஜாசக்தி தேசிய வறுமை ஒழிப்பு வேலைத்திட்டம் தொடர்பான விழிப்புணர்வு நிகழ்வு, இன்று (28.10.2026) கிளிநொச்சியில் உள்ள தனியார் விருந்தகத்தில் நடைபெற்றது.

இதன்போது, கிராமிய மக்களை வலுவூட்டும் தேசிய சமூக வலுவூட்டல் வேலைத்திட்டம் தொடர்பாக வடமாகாண சமுர்த்தி உத்தியோகத்தர்களுக்கு விளக்கமளிக்கப்பட்டது.

வறுமை என்பது வெறுமனே பொருளாதாரப் பற்றாக்குறை மட்டுமல்ல; அது வாய்ப்புகள், வளங்கள் மற்றும் முன்னேற்றத்திற்கான அணுகல் ஆகியவற்றுடன் தொடர்புடைய சவாலுமாகும். இச்சவாலை ஒன்றிணைந்து எதிர்கொண்டு, மக்களின் பங்கேற்புடன் நிலையான கிராமிய அபிவிருத்தியை ஏற்படுத்துவதே இத்தகைய வேலைத்திட்டங்களின் முக்கிய நோக்கமாகும்.

இந்நிகழ்வில் கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் அமைச்சர் உப்பாலி பன்னில பிரதம விருந்தினராகக் கலந்துகொண்டார். மேலும், கிளிநொச்சி மற்றும் முல்லைத்தீவு மாவட்ட அரசாங்க அதிபர்கள், கிளீன் ஸ்ரீலங்கா வேலைத்திட்டத்தின் கிளிநொச்சி மாவட்ட இணைப்பாளர் மருங்கன் மோகன், பிரதேச செயலாளர்கள், சமூக சக்தி தலைவர்கள் மற்றும் அங்கத்தவர்கள் உள்ளிட்ட பலரும் கலந்துகொண்டனர்.

இதன்போது ஊடகங்களுக்குக் கருத்துத் தெரிவித்த அமைச்சர், பிரஜாசக்தி தேசிய மேம்பாட்டுத் திட்டத்தின் நிதி ஒதுக்கீடுகள் மற்றும் நிர்வாக நடைமுறைகள் தொடர்பான தகவல்களைப் பகிர்ந்துகொண்டார்.

பிரஜாசக்தி திட்டத்தின் கீழ் மூலதனத் திட்டங்களை அந்தந்த மாவட்டச் செயலாளர்கள், குறிப்பாக மாவட்டச் செயலகங்களின் மாவட்டத் திட்டமிடல் பணிப்பாளர்கள் மற்றும் பிரதேச செயலாளர்கள் தலைமையிலான மாவட்ட மற்றும் பிரதேச உத்தியோகத்தர்கள் ஊடாகச் செயல்படுத்தத் திட்டமிடப்பட்டுள்ளது.

2026ஆம் ஆண்டில் இத்திட்டத்திற்காக முல்லைத்தீவு மாவட்டத்திற்கு 324 கோடி ரூபாவும், கிளிநொச்சி மாவட்டத்திற்கு 324 கோடி ரூபாவும் ஒதுக்கப்பட்டுள்ளன.

மேலும், முல்லைத்தீவு மாவட்டத்தில் உள்ள 363 கிராமங்களுக்கும், கிளிநொச்சி மாவட்டத்தில் உள்ள 325 கிராமங்களுக்கும் இத்திட்டத்தின் கீழ் நிதியுதவி வழங்கப்பட்டுள்ளது. கிராமியத் தொழில்முயற்சிகள் மற்றும் கிராம அபிவிருத்திக்காக மேலதிகமாகவும் மில்லியன் கணக்கான ரூபா நிதி ஒதுக்கப்பட்டுள்ளதாகத் தெரிவிக்கப்பட்டது.

கிராமப்புற மக்களின் வாழ்க்கைத்தரத்தை உயர்த்துதல், அடிப்படை வசதிகளை மேம்படுத்துதல், வருமானத்தை அதிகரித்தல் மற்றும் ஒதுக்கப்பட்ட நிதியைத் திறம்படப் பயன்படுத்தி கிராமங்களின் ஒட்டுமொத்த வளர்ச்சியை ஏற்படுத்துதல் ஆகியவை மாவட்ட நிர்வாகத்தின் முக்கிய பொறுப்புகளாகும் என அமைச்சர் குறிப்பிட்டார்.