ஈரான் தலைமையில் முக்கிய பாதுகாப்புப் பேச்சுவார்த்தை

மேற்கு ஆசியப் பகுதியில் மீண்டும் போர்ப் பதற்றம் அல்லது மோதல் சூழல் உருவாகலாம் என்ற தீவிர கவலைகள் நிலவும் நிலையில், ஈரான் தலைநகர் தெஹ்ரானில் முக்கிய பிராந்திய நாடுகளின் உயர்மட்டப் பாதுகாப்பு அதிகாரிகள் பங்கேற்ற இரகசிய ஆலோசனைக் கூட்டம் நடைபெற்றுள்ளது.

ஈரான், பாகிஸ்தான், சவூதி அரேபியா மற்றும் துருக்கி ஆகிய நான்கு நாடுகளின் முக்கிய பிரதிநிதிகள் இந்தக் கூட்டத்தில் கலந்துகொண்டனர்.

கூட்டத்தில் பங்கேற்ற தலைவர்களின் பதவிகளும் பொறுப்புகளும் பிராந்தியத்தின் தற்போதைய தீவிரமான சூழ்நிலையை வெளிப்படுத்துவதாக அமைந்திருந்தன.

கூட்டத்திற்குப் பின்னர் வெளியிடப்பட்ட உத்தியோகபூர்வ அறிக்கையில், பிராந்திய அமைதி மற்றும் பாதுகாப்பை வலுப்படுத்துவது உள்ளிட்ட பல்வேறு துறைகளில் நான்கு நாடுகளுக்கும் இடையிலான ஒத்துழைப்பை அதிகரிக்கும் நோக்கில் பேச்சுவார்த்தைகளைத் தொடர்ந்து முன்னெடுக்க இணக்கம் தெரிவிக்கப்பட்டுள்ளதாகக் குறிப்பிடப்பட்டுள்ளது.

ஈரான் தொடர்ந்து வலியுறுத்தி வரும், “பிராந்திய அமைதியைப் பிராந்திய நாடுகளே தீர்மானிக்க வேண்டும்” என்ற கொள்கையை இந்தச் சந்திப்பும் மீண்டும் உறுதிப்படுத்தியுள்ளது.

கதவுகளுக்குப் பின்னால் நடைபெற்ற பேச்சுவார்த்தைகளின் முழுமையான விவரங்களை ஈரான் வெளியிடவில்லை என்றபோதிலும், பிராந்தியத்தில் முன்னெடுக்கப்படும் இந்த ராஜதந்திர நகர்வுகள் முக்கியத்துவம் வாய்ந்ததாகக் கருதப்படுகின்றன.