கலிபோர்னியா வாக்குகள் தொடர்பில் நீதிமன்றம் அதிரடி

அமெரிக்காவின் கலிபோர்னியா மாநிலத்தில் வெளிநாட்டுப் பிரஜைகளாக இருக்கலாம் எனச் சந்தேகிக்கப்படும் 20,000-க்கும் அதிகமான பதிவு செய்யப்பட்ட வாக்காளர்களின் அஞ்சல் வாக்குகளைத் தனியாகப் பிரித்து வைக்குமாறு அமெரிக்க ஜனாதிபதி டொனால்ட் ட்ரம்ப் நிர்வாகம் விடுத்த கோரிக்கையை அந்நாட்டு உயர் நீதிமன்றம் நிராகரித்துள்ளது.

அமெரிக்க நீதித்துறை முன்வைத்த அவசர மனுவை, தாக்கல் செய்யப்பட்ட சில மணித்தியாலங்களிலேயே நேற்று (02) உயர் நீதிமன்றம் நிராகரித்துள்ளது.

குறித்த வாக்காளர்கள் அமெரிக்கக் குடியுரிமை இல்லாதவர்களாக இருக்கலாம் என மத்திய அரசாங்க அதிகாரிகள் சந்தேகம் வெளியிட்டிருந்தனர். அவர்களால் அளிக்கப்பட்ட வாக்குகளைத் தனியாகப் பிரித்து வைத்து, குடியுரிமை உறுதிப்படுத்தப்படும் வரை அவற்றை எண்ணுவதைத் தடுக்க வேண்டும் என ட்ரம்ப் நிர்வாகம் கோரியிருந்தது.

எனினும், அமெரிக்க மத்திய அரசாங்கம் தயாரித்த வாக்காளர் பட்டியலின் நம்பகத்தன்மை குறித்து கலிபோர்னியா மாநில அதிகாரிகள் கேள்வி எழுப்பியிருந்தனர். அந்தப் பட்டியலில் தவறுகள் இருக்கக்கூடும் என்றும், இதனால் தகுதியுள்ள அமெரிக்கக் குடிமக்களின் வாக்குரிமை பாதிக்கப்படலாம் என்றும் அவர்கள் சுட்டிக்காட்டியிருந்தனர்.

இந்தக் கோரிக்கையை ஏற்கனவே விசாரித்த கீழ் நீதிமன்றமும், மேல்முறையீட்டு நீதிமன்றமும் நிராகரித்திருந்தன. இதனையடுத்து, ட்ரம்ப் நிர்வாகம் அமெரிக்க உயர் நீதிமன்றத்தை நாடியிருந்தது.

அமெரிக்காவில் இடைத்தேர்தல் நடைபெறுவதற்கு ஒரு நாள் முன்னதாக இந்த அவசர மனு தாக்கல் செய்யப்பட்டிருந்தது. எனினும், மனுவை நிராகரித்த உயர் நீதிமன்றம், அதற்கான காரணங்களைத் தனது உத்தரவில் குறிப்பிடவில்லை. அதேவேளை, எந்தவொரு நீதிபதியும் தீர்ப்புக்கு எதிராகக் கருத்து வெளியிடவில்லை.

கலிபோர்னியா மாநிலத்தில் தேர்தல் நடைமுறைகளை நிர்வகிக்கும் அதிகாரம் மாநிலத்துக்கே உரியது என்றும், சந்தேகத்தின் அடிப்படையில் வாக்குகளைத் தடுத்து நிறுத்துவது தகுதியுள்ள வாக்காளர்களின் உரிமையைப் பாதிக்கக்கூடும் என்றும் மாநிலத் தரப்பு வாதிட்டிருந்தது.

இந்தத் தீர்ப்பின் மூலம், சர்ச்சைக்குரிய வாக்குகளைத் தனியாகப் பிரித்து எண்ணுவதைத் தடுக்க வேண்டும் என்ற ட்ரம்ப் நிர்வாகத்தின் அவசரக் கோரிக்கை நிராகரிக்கப்பட்டுள்ளது.