அதிக வாக்கு வித்தியாசத்தில் ஒலிவியா சௌ வெற்றி

கனடாவின் டொராண்டோ நகர மேயர் தேர்தலில் கடும் போட்டி நிலவிய நிலையில், ஒலிவியா சௌ தனது முக்கியப் போட்டியாளரான நகரசபை உறுப்பினர் பிராட் பிராட்போர்டைத் தோற்கடித்து, மீண்டும் மேயராகத் தேர்ந்தெடுக்கப்பட்டுள்ளார்.

எளிய மற்றும் நடுத்தர வருமானம் கொண்ட மக்களின் வாழ்க்கைச் செலவைக் குறைப்பதை முக்கிய வாக்குறுதியாக முன்வைத்து அவர் இந்த வெற்றியைப் பெற்றுள்ளார்.

ஒலிவியா சௌ 54.2 சதவீத வாக்குகளுடன் 5,32,201 வாக்குகளையும், பிராட் பிராட்போர்ட் 41.1 சதவீத வாக்குகளுடன் 4,04,013 வாக்குகளையும் பெற்றனர்.

இதன்மூலம், 1,28,188 வாக்குகள் வித்தியாசத்தில் ஒலிவியா சௌ வெற்றி பெற்றுள்ளார்.

வெற்றிக் கொண்டாட்டத்தின்போது கருத்துத் தெரிவித்த ஒலிவியா சௌ, “டொராண்டோ மக்கள் தங்கள் முடிவை அறிவித்துவிட்டார்கள். எனக்கு வாக்களித்தவர்கள், வாக்களிக்காதவர்கள், வாக்களிக்கும் உரிமை இல்லாதவர்கள் என, டொராண்டோவைத் தங்கள் இல்லமாகக் கொண்டு உழைக்கும் ஒவ்வொருவருக்கும் நான் கூறுவது இதுதான்: நானும் உங்களுக்கான மேயர்தான்” என நெகிழ்ச்சியுடன் தெரிவித்தார்.

தோல்வியை ஏற்றுக்கொண்ட பிராட் பிராட்போர்ட், ஒலிவியா சௌவுக்குத் தொலைபேசியில் வாழ்த்துத் தெரிவித்ததுடன், மக்களின் தீர்ப்பையும் ஏற்றுக்கொள்வதாகக் கூறினார்.